"Loqos" Psixoloji və Nitq inkişafı mərkəzinin tərəfdaşlığı ilə "COVİD" layihəsinə start verilib

İslahat.az xəbər verir ki, hər kəsə məlum olduğu kimi, karantin müddəti və karantin sonrası dövrdə insanların psixoloji sağlamlığının qorunması ən vacib amillərdən biridir. Bu amili nəzərə alaraq, pandemiya dövründə gənclərin psixoloji sağlamlığına, düşüncəsinə, şəxsi inkişafına dəstək göstərmək, həmçinin Azərbaycan dilində psixoloji podkast platformasının yaradılması və inkişaf etdirilməsi məqsədilə "ASAN Könüllülük Məktəbi"nin təşəbbüs və təşkilatçılığı, "Loqos” Psixoloji və Nitq İnkişaf Mərkəzinin tərəfdaşlığı və "ASAN Radio"nun media dəstəyi ilə Canlı Organik Virtual İnkişaf Dalğası(COVİD) layihəsinə start verilmişdir.

Layihə çərçivəsində "Loqos” Psixoloji və Nitq İnkişaf Mərkəzinin tərəfdaşlığı ilə peşəkar psixoloqlar tərəfindən gənclərin həyat tərzinin dəyişməsinin adaptasiya dövrünə dəstək göstərəcək və şəxsi inkişafın artırılmasına sövq edəcək podkastlar hazırlanaraq, sosial podkast platformalarında yerləşdiriləcək.

Nəzərinizə çatdıraq ki, layihə çərçivəsində müxtəlif mövzularda peşəkar psixoloqlar tərəfindən virtual interaktiv görüşlərin keçirilməsi nəzərdə tutulub.