İslahat.az xəbər verir ki, Azərbaycan Respublikası Müdafiə Nazirliyinin, Şuşa şəhər Dövlət Qoruğunun və "Fire Land Production”ın təşkilatçılığı ilə təşkil olunan "Mənim atam qəhrəmandır”, "Mənim oğlum qəhrəmandır” layihəsi çərçivəsində Şuşada tanınmış simalar Alim Qasımov, Nurəddin Mehdixanlı, Rasim Balayev, Zülfiyyə Xanbabayevanın iştirakı ilə keçirilən tədbirdə Azərbaycanın təhsil sisteminin layiqli nümayəndələri - Tofiq İsmayılov adına 6 nömrəli məktəb-liseyin direktoru Gülşən Orucova, 82 nömrəli məktəbin direktoru Leyla Fətiyeva və 20 nömrəli məktəbin direktoru Esmira Ağayeva da iştirak ediblər.
Tədbirdə iştirak edən Tofiq İsmayılov adına 6 nömrəli məktəb-liseyin direktoru Gülşən Orucova Şuşa təəssüratları ilə bölüşüb. "Vətənin ərazi bütövlüyü uğrunda, Vətən müharibəsində canından, qanından keçmiş vətən oğullarının analarına, xanımlarına, övladlarına dəstək olduq. O uşaqların əllərindən tutub, anaların məğrur baxışları ilə Qarabağ torpağına qürurla addım atmaq, aydın, azad Azərbaycan torpağına, arzuların şəhəri Şuşaya qəhrəman övlad anaları və şəhid övladlari ilə getmək bizə fəxarət hissi yaşatdı.
Dünya "evdə qal” deyəndə, Azərbaycan əsgəri silaha sarılaraq, düşməni Qarabağdan qovaraq, doğma evinə qayıtdı. Budur mənim ölkəmin birliyi, əzmi!”.
İslahat.az
