İslahat.az xəbər verir ki, Azərbaycan Respublikasının aparıcı gənclər təşkilatlarının və könüllü hərəkatlarının 1 500-dən çox nümayəndəsi Vətən Müharibəsinin başlamasının birinci ildönümü ilə əlaqədar Fəxri və Şəhidlər xiyabanını ziyarət ediblər.
Fəxri Xiyabanı ziyarət zamanı Ermənistan tərəfindən işğal olunmuş Azərbaycan ərazilərinin düşmən əsarətindən xilas edilməsinin ilkin hüquqi-siyasi təməlinin xalqımızın Ümummilli Lideri Heydər Əliyev tərəfindən qoyulduğu xüsusi olaraq vurğulandı, Müzəffər Ali Baş Komandanın ata vəsiyyətinə əməl edərək "Dəmir Yumruq” əməliyyatı nəticəsində düşməni kapitulyasiyaya məcbur etməsi ilə Ulu Öndərin ruhunun da şad olduğu bildirildi.
Ziyarətin davamında Vətənin ərazi bütövlüyü uğrunda gedən döyüşlərdə canlarından keçmiş şəhidlərin xatirəsinə ucaldılmış Əbədi məşəlin önünə və şəhidlərin məzarlarına gül dəstələri qoyuldu.
İslahat.az