14 Sentyabr 2021
16:52
20236

Bir neçə gün öncə ölüm hadisəsi olan “pub”da yenə dava olub - RƏSMİ

Daxili İşlər Nazirliyi "Beerlin Pub”ın qarşısında baş verən insident və polisə müqavimətlə bağlı yayılan məsələyə münasibət bildirib. 

İslahat.az xəbər verir ki, Daxili İşlər Nazirliyinin Mətbuat Xidmətinin əməkdaşı, polis mayoru Anar Qafarov Oxu.Az-ın sorğusuna cavab olaraq bildirib ki, 2021-ci ilin sentyabrın 12-i, saat 23:40 radələrində Bakı şəhər sakini O.Tağızadə və qardaşı K.Tağızadənin Xətai rayonu, Xocalı prospekti 25-də yerləşən "Beerlin Pub”un qarşısında Bakı şəhər sakini R.Xammədovla aralarında mübahisə yaranıb:

"Mübahisə zamanı R.Xammədov O.Tağızadəni bir dəfə yumruqla üz nahiyəsinə vuraraq ona bədən xəsarəti yetirib. Tərəflər arasında baş verən insidentdən sonra ərazi üzrə Xətai Rayon Polis İdarəsinin əməkdaşları hadisə yerinə cəlb edilib.

Hər üç şəxs saxlanılaraq ərazi üzrə Xətai Rayon Polis İdarəsinin 37-ci Polis Şöbəsinə aparılıb və onların izahatları alınıb”.

A.Qafarov qeyd edib ki, hazırda baş verən xuliqanlıq faktı ilə bağlı zəruri təhqiqat araşdırmaları davam etdirilir.

Qeyd edək ki, bir müddət əvvəl "Beerlin pub” klubunun mühafizəçisi Orxan Şahbazov iaşə obyektində müştəri olan 1981-ci il təvəllüdlü Mustafayev Vüqar İlham oğlunu döyərək qətlə yetirib.

İslahat.az