25 May 2022
15:53
17673

Ermənistan vaxt itirmədən Azərbaycanın qoyduğu şərtləri qeyd-şərtsiz qəbul etməlidir

Mayın 22-də baş tutan Brüssel görüşü Azərbaycan Prezidentinin siyasi və diplomatik fəaliyyətinin məntiqi davamının nəticəsində həyata keçirilən vacib görüşdür. Prezident İlham Əliyev hər zaman tələblərini ortaya qoymuş və haqlı mövqeyimizi yüksək səviyyədə müdafiə etmişdir. O, diplomatik müstəvidə liderlik nümayiş etdirmiş, peşəkarlığı sayəsində ölkəmizi layiqincə təmsil etmişdir.

44 günlük Vətən müharibəsində əldə etdiyimiz şanlı qələbə isə bütün dünyaya Azərbaycan dövlətinin və onun başçısının gücünü göstərdi. Məhz bunun nəticəsində Azərbaycan şərtləri diqtə edən tərəfə çevrilib. Bizim əsas amalımız isə sülhün əldə olunmasıdır. Bu da regionun inkişafı, vətəndaşların əmin-amanlığı üçün əsas şərtdir. Sülh təbliğatçısı missiyasını həyata keçirən Azərbaycan dövləti regionda sülhün təminatçısı ola biləcək ölkədir. Azərbaycan tərəfinin şərt və istəkləri bizim haqqlı mövqeyimiz olmaqla yanaşı ümumilikdə regionun inkişafına yönəlib. Brüssel görüşündə əldə olunan nəticələr də bunu sübut edir.

Sonuncu üçtərəfli görüş Prezident İlham Əliyevin Avropa İttifaqı Şurasının Prezidenti Şarl Mişel və Ermənistanın Baş naziri Nikol Paşinyanla birgə 3-cü müzakirəsi idi. Avropa İttifaqının vasitəçiliyinin səmərəliliyinə gəldikdə isə cənab Prezident Şarl Mişelin 2 ölkə arasında Sülh müqaviləsinin hazırlanması, münasibətlərin normallaşdırılması, nəqliyyat dəhlizlərinin açılması, sərhədlərin delimitasiyası və demarkasiyası proseslərinə verdiyi dəstəyi yüksək qiymətləndirdiyini ifadə etdi. Görüşün nəticəsində bir sıra məsələlərlə bağlı razılıqların əldə edilməsi Sülh müqaviləsinin imzalanmasının yaxın zamanlarda baş tutacağına əminlik yaradır. Sərhəd məsələləri, nəqliyyat əlaqələrinin açılması, sülh sazişinə dair məsələlərin müzakirəsi istiqamətində əldə olunan razılıqlar Brüssel görüşünün məhsuldarlığını göstərir. Prezident İlham Əliyev ölkəyə geri döndükdən sonra Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyasının yaradılması haqqında sərəncam imzaladı. Ermənistanın Baş naziri də eyni mahiyyətli sənədi imzalayaraq işlərə başlamışdır. Bu hal görüşdə müsbət nəticələrin əldə olunmasına işarə edir.

Sülh sazişinin imzalanması bütövlükdə regionun inkişafına böyük fayda verəcək. Qarşı tərəf Azərbaycanın humanizm dəyərlərinə əsaslanaraq yaratdığı şansdan düzgün şəkildə faydalanmağı bacarsa bununla regionda uzunmüddətli sülhün təmin edilməsinə nail olunacaq. Bu da öz növbəsində yeni imkanlar yaradacaq. Azərbaycan tərəfi milliyyətindən, mənsubiyyətindən asılı olmayaraq insanların rahat yaşamasına səbəb olacaq addımlar atacaq. Ermənistən vaxt itirmədən Azərbaycanın qoyduğu şərtləri qeyd-şərsiz qəbul etməli və prosesin sürətlənməsində töhfələr verməli, qısaca üzərinə düşən öhdəlikləri yerinə yetirməlidir.

Milli Məclisin deputatı, YAP İdarə Heyətinin üzvü Şahin İsmayılov

İslahat.az