11 Oktyabr 2019
15:27
1089

Bakı şəhərində beynəlxalq gənclər tədbiri öz işinə başladı

Gənclər üçün Təhsil Mərkəzinin Avropa Komissiyasının Təhsil, Audiovizual və Mədəniyyət üzrə İcraçı Agentliyi tərəfindən dəstəklənən "3 ölkədə gənc sahibkarlar klubunun yaradılması” layihəsi çərçivəsində Bakı şəhərində beynəlxalq tədbir öz işinə başlamışdır. 

İslahat.az xəbər verir ki, tədbirdə açılış nitqi ilə Mərkəzin Baş katibi Gülnar Xəlilova çıxış edərək, qonaqları salamlamışdır. O, tədbirdə Azərbaycan, Türkiyə, Böyük Britaniya, İspaniya, Moldova və Gürcüstandan 30-dan çox gəncin iştirak etdiyini diqqətə çatdıraraq, beynəlxalq təlim kursunda sahibkarlıq fəaliyyətinin dəstəklənməsi, gənc sahibkarlar üçün xüsusi alətlərin və imkanların yaradılması, innovativ ideyaların uğurlu biznesə çevrilməsi, startup layihələrin hazırlanması və s. istiqamətdə bilik və bacarıqların öyrədiləcəyini vurğulamışdır. 

Tədbirdə iştirak edən nümayəndə heyətlərinin üzvləri də çıxış edərək, Bakı şəhərində ilk dəfə olduqlarından məmnunluqlarını bildirmiş, habelə yerli televiziyalara bu barədə müsahibə vermişlər. Mərkəz tərəfindən təşkil edilən tədbirin onların təhsil və iş həyatlarında böyük əhəmiyyətə malik olacağını da diqqətə çatdırmışlar. 

1 həftə davam edəcək tədbir müddətində iştirakçılar təlim proqramında iştirakla yanaşı, müxtəlif dövlət və özəl qurumlarla görüşlər keçirəcək, Bakının tarixi-mədəni obyektləri ilə tanış olacaq və Azərbaycan mədəniyyət gecəsinə qatılacaqlar. 

Qeyd edək ki, layihə çərçivəsində Azərbaycanın, Gürcüstanın və Moldovanın paytaxtlarında gənc sahibkarlar klublarının yaradılması, Azərbaycanda və Gürcüstanda 2 beynəlxalq təlim kursunun, gənclər mübadiləsinin və 1 beynəlxalq konfransın keçirilməsi nəzərdə tutulmuşdur.

Artıq ötən ay Gürcüstanda ilk beynəlxalq tədbir keçirilmişdir. 

Layihənin tərəfdaşları Böyük Britaniyanın NEFELİ Beynəlxalq Təhsil Şəbəkəsi, İspaniyanın PRÓXIMA Təhsil və Mədəniyyət Assosasiyası,  Türkiyənin Uludağ Universiteti, Gürcüstanın KinoYeast Gənclər Assosasiyası və Kişinyov şəhər Təhsil, Gənclər və İdman Baş İdarəsidir. 

Layihə 2020-ci ilin iyun ayınadək davam edəcək.
 
İslahat.az